Fréttir af hinu og þessu...

Mér hefur fundist rosalega gaman að takast á við ný verkefni í vinnu síðustu daga, þetta er svona eins og að fara úr þriðju deild upp í þá fyrstu. Stökkið er slatti en það er alltaf hægt að sækja lengra og reyna að komast í úrvalsdeild. Ég er farinn að vinna eðlilegan vinnudag sem spannar átta til níu tíma. Ég hef nú meiri tíma til að eyða með fjölskyldunni minni sem gerir það að verkum að ég fæ meira út úr lífinu samkvæmt staðlinum. Þetta er því ekkert nema gott mál. Það kom rigning í dag sem er í fyrsta skipti síðan 15. maí, það má segja að maður hafi ekki þurft að slá mikið en ég veit ekki hvort það er gott eða vont. Það eru tvær vikur síðan ég kláraði prófin mín og ég náði þeim öllum, ég var ekki að skora hátt en það er í beinu samhengi við yfirvinnutímanna mína á þessari önn, ég ætla ekki að segja frá því hvað þeir voru margir því ég skammast mín fyrir þá. Einhvern tímann þótti maður duglegur en nú á dögum flokkast þetta undir rugl. Það er þó bara þannig að maður verður að klára verkefnin sín ef að maður á að fá einhver verkefni.
Ég varð 31 árs um daginn og það var frábært, svolítið hlutlaus aldur verð ég að segja þar sem að ekkert tugahlaup átti sér stað. Hjördís gaf mér geðveika Diesel style lab skó sem hún keypti í höfuðborg norðurlandanna fyrr í mánuðinum, þeir eru gulir og rokka feitt ásamt því að gera mér kleift að svífa um, það er allt of gott að vera í þeim og ég tala nú ekki um hversu gott er að ganga í þeim. Einnig gaf hún mér góðan rakspíra sem ég veit ekki hvað heitir, jú Jacobsen eða eitthvað svoleiðis, nenni ekki að hlaupa inn á bað. Svo gaf mamma mér lítið nett GPS tæki sem ég er ekkert smá ánægður með, þetta er svona á stærð við GSM síma og virðist vera þvílíkt sniðugt. Ég ætla að taka það með í næsta skokk til að kunna eitthvað þegar að farið verður í næstu göngu. Annars var geisladiskur með tækinu sem inniheldur upplýsingar með tali á íslensku, þetta er eitthvað sem ég hef ekki séð áður. Annars reyndi ég að hlusta og fara yfir þetta en mér líður eins og ég sé á skólabekk þegar ég hlusta þannig að það eru smá átök að meðtaka.
Höfuðið á mér er stútfullt af nýjum upplýsingum í sambandi við vinnu, þetta er svona eins og þegar félagi minn í Sverige henti mér á bólakaf í Navision sundlaugina án kúts, ég svamlaði þar í marga mánuði þar til ég náði að kortleggja leiðina að landi og steig á bakkann.
Við erum búin að fara aðeins út úr bænum þrjár helgar í röð þó svo það hafi ekki verið langar ferðir. Esjan og Arnarfell liggja í valnum svo fórum við í heimsókn til Önnu og Vidda í sumarbústað í gær. Bústaðurinn er rétt hjá Laugarvatni þannig að ekki var annað hægt en að skella sér í gufuna þar í gær. Það er svo geðveikt að fara þarna í þessa náttúrulegu gufu. Það er greinilega verið að hreinsa til þarna og það voru kerti út um allt og einhver undursamlegt við að svitna út þarna. Ég væri til í að vera þarna í nokkra klukktíma og endurnærast algjörlega. Ég mæli eindregið með þessu.
Erna og Sigfús giftu sig á laugardaginn og var okkur boðið í þá athöfn. Giftingin var í Garðakirkju og var athöfnin falleg, svo var veislan í Ýmissalnum hérna í hlíðunum. Þetta var 140 manna veisla og stóð hún langt fram á nótt, ég held að við höfum dottið inn um þrjú leytið sem er nokkuð seint á okkar skala. Þetta var allt til fyrirmyndar og skemmtu allir sér þrusuvel.
Nýjasta hugmyndin mín er að fá mér bassa, kannski kassabassa sem væri örugglega fínt stofustáss, eitthvað held ég að síðasta komment falli ekki í kramið en allavega var það alltaf draumur minn að spila á bassa, það er á eftir trommunum. Mér finnst bara allur bassagangur í tónlist þessa daganna vera greinilegri heldur en venjulega þannig að eitthvað kraumar í höfðinu. Kannski er þetta bara svona kreðsa sem verður horfin á næsta flóði. Talandi um flóð þá er farið að styttast í að ég dembi mér í hafið. Ég þyrfti að dýfa mér í vikunni þó svo það verði stutt. Það er eitthvað við að taka fyrstu dýfunna á hverju ári. Sjórinn líklega undir tíu gráðum ennþá. Ég verð bara að herða mig áður en við förum til Stokkhólms því þar skal synt aðeins í vatninu. Ágrímur fór í hafið um daginn og talaði um undarlega sviðatilfinningu í húðinni. Það er einmitt það sem gerist, húðin tekur einhvern kipp við þetta og þetta er svona brunatilfinning. Allavega er markið sett á að hafa dýft sér áður en vikan er liðinn.
Grissam er að sí ess æast í sjónavarpinu og gjörsamlega að færast nær sannleikanum um morðið á einhverjum. Mig langar í klatta.
Hjördís fór með mig á Maru og gaf mér sushi á afmælisdaginn minn, það var eitthvað svo kærkomið því ég var búin að ná mér eftir að fá nett ógeð af sushi eftir Lúndúnarferð okkar hjónanna. Sushi er algjör snilld og Hjördís fær átján punkta fyrir þessa hugmynd á föstudaginn.
Æji það er stundum erfitt að hanga í sófanum heila kvöldstund en ég hef bara gott af því, þetta er svona liður í að slaka á. Ég held ég sé ennþá þreyttur eftir að vaka fram á nótt á laugardaginn, kannski er það tengingin við að vera orðinn gamall. Maður er ekki maður í langar vökur enda stend ég bara upp á rönd og geispa í hring.
Í kvöld var eldað risotta í mávahlíðinni, klikkar ekki og algjör snilld.
Jæja lappinn farinn að hita gallabuxurnar þannig að tími er kominn til að hætta þessu bulli og hlusta á lokaorð Grissams í æinu, sennilega einhver speki í formi brandara sem á að skilja mann eftir í umhugsunarstellingu fram á nótt.

Með von um að allir hafi það gott og að allir hagi sér vel...

Súngam hersveitarforingi.
p.s Hjördís segi að maltöl sé livesaver og ég á eftir að sjá nýju Star Wars myndina.

Óþolandi úrslit

Ég er alveg miður mín að Selma skyldi ekki komast í úrslit, ég er bara eitthvað tapsár núna. Þetta er eins og þegar að Ítalía tapar í boltanum, þá verð ég alveg sérstaklega pirraður. Hvað um það, ekkert getur maður gert í þessu. Sá að Frikkx er hættur að blogga í bili og þykir mér það miður, verður þess valdandi að dagleg rútína mín fer aðeins úr skorðum en ég fyrirgef það og sýni þessu fullan skilning. Það gengur ágætlega hjá mér í nýju vinnunni og ég er sáttur. Ég er aðallega glaður yfir því að það sé komið sumar. Búin að skokka tvo daga í röð og veitir ekki af þar sem ég er límdur í stól allan daginn. Ground control to major Tom, snilld. Take your protein pills and put your helmet on.

Nú er að koma helgi aftur og spurning hvort að eitthvað verði labbað, sá reyndar flotta gönguferð á Spáni á vefnum, spurning hvort það verði eitthvað skoðað. Æji ég er að kafna af því að horfa á tölvuskjá hérna, nenni ekki að skrifa meira þar sem annað augað er farið að renna út á hlið og ég að renna úr sófanum. Verð í bandi...

Starman waiting in the sky, gítarsóló og lalalalalalala lalallalalaallalalalalaalalalallala,

Esjan alveg róleg

Það hafði ekki mikið breytst á Esjunni síðan síðast. Við fengum rosalega gott veður í gönguna og skemmtum okkur konunglega. Það var eitthvað við ferska loftið og allt það sem kallar á mann í svona göngum. Við vorum ekkert rosalega lengi að labba þetta núna. Matarboð beið okkar hjá Vidda, Önnu og Tómasi þegar við komum í bæinn. Ekki amalegt að fá snilldar mat þegar að búið er að labba svona. Við sátum svo og spjölluðum aðeins fram á kvöldið og þá var haldið heim. Við horfðum á einhverja leiðinlega mynd og fórum svo að sofa. Við höfum tekið það rólega í dag og sitjum nú í stofunni og hlustum á ABBA, ekki slæmt. Stefnan er sett á bíó á eftir og sjá það sem átti alltaf að sjá á kvikmyndahátíðinni.

Á laugardagskvöldið fórum við á opnun listahátíðar í listasafninu og horfðum á þá dagskrá sem þar var á boðstólnum. Það sem stóð uppúr var Trabant, þvílílkir snillingar eru þetta. Tónlist þeirra og flutningur var algjör snilld.

Í dag er einnig á stefnuskránni að ganga endanlega frá sumarfríinu okkar, við höfum ekki nennt að spá í þessu fram að þessu, ég held reyndar að við nennum því ekkert núna, við verðum bara að gera þetta svo við endum ekki í Norrænu í hringtúr þar sem við fáum ekki einu sinni að fara í land.

Annars ekkert stórkostlegt að gerast nema kannski það að sumarið virðist vera að skella á.......

Maður bloggar

Það hefur verið slegið nýtt met hérna, ekkert blogg í óratíma. Ég kláraði prófin á föstudag, ég ætla ekkert að tjá mig um það fyrr en að niðurstöður liggja fyrir. Satt best að segja líður mér núna eins og kartoni af sígarrettum sem hent hefur verið inn á hlemm. Allur tættur og úfinn, nei ég er bara pínu þreyttur eftir allt saman. Ég er hættur í starfinu mínu og byrja í nýju á þriðjudaginn, það eru því smá breytingar hjá mér og ég vonast til þess að hafa tekið réttar ákvarðanir í því sambandi. Eru ekki allar ákvarðanir réttar þangað til annað kemur í ljós. Hjördís stakk af í fjórar nætur um daginn og var í höfuðborg norðurlandanna. Ég komst að því að þetta var allt of langur tími og er hún vinsamlegast beðinn um að reyna að stytta þessar ferðir eða taka mig með, ég var reyndar í prófum þarnnig að það var ekki option.

Núna erum við á leið í pönnukökur og svo er stefnan sett á Esjuna, nú er tímabilið að hefjast þar sem að hlaupið verður á fjöll. Ég ætla mér að blogga einhverja vitleysu í kvöld þar sem ég verð að losa um ruglið í hausnum á mér....