Það og allt hitt

Ég er að fara í fyrsta prófið mitt á næsta mánudag, svo er eitt á föstudaginn 6. maí og síðasta þann 13. maí. Ég tek svo við nýju starfi þann 17. maí og þetta er því ekki mikill tími sem fer í að gera rosalega mikið. Svona er nú prógrammið hjá mér næstu vikur. Eftir að skóli er búinn þá fer maður að stökkva í tjaldútilegur og svoleiðis snilld, er farinn að þrá að leggjast í tjald langt í burtu frá borgarmörkunum, reyndar þarf það ekkert að vera langt í burtu.

Ég finn það að smá álag er á mér þessa daganna og ég þarf að vera í andlegu jafnvægi svo að ég missi mig ekki í að verða hundleiðinlegur, vill frekar vera kattskemmtilegur. Það er smá gleði hjá okkur vinnufélögunum á föstudagkvöldið þar sem við erum að tvístrast í sundur sökum mikillar hreyfingar á atvinnumarkaðnum. Það verður gaman að gera eitthvað skemmtilegt. Þetta er í tíunda skipti sem ég sit og blogga meðan að kosið er í Survivor. Skrýtið.

Jæja það er kominn háttatími og best að fara að leggja sig...

Gleðilegt sumar

Vil óska öllum gleðilegs sumars og takk fyrir veturinn. Megum við öll stikna í sólinni í sumar.

Ótrúlegt en satt þá er ég að vinna á þessum degi en ætla ekki að vera mjög lengi. Það er bíópressa að heiman og þarf ég að sinna þeim skyldum......

Blogg

Djöfull er ég búin að vera slappur í blogginu síðustu daga, eru dagar bloggsins taldir eða hvað? Ég hef bara haft svo mikið annað að hugsa um eða kannski er þetta bara ekki eins ofarlega í huga mér núna. Kaupmannahafnarferðin var algjör snilld, við löbbuðum um alla borg og skoðuðum hverfi sem við höfðum ekki séð áður. Það var farið á fullt af veitingastöðum og svo var verslað aðeins. Reyndar verslaði ég ekki mikið en það er víst líka hægt að gera það hér heima. Heyrði í Frikka frá stokkhólmi í gær og hann kemur til landsins á föstudag, á eftir að fá ferðasögu frá honum þar sem ekkert var minnst á Parísarferð þeirra félaga.

Dagurinn í dag verður langur eins og veturinn og þarf ég að vinna líka á morgun en sá dagur verður vonandi stuttur eins og sumarið.

Kláraði Nice work bókina í gær þar sem ég þurfti að gera grein fyrir henni í tíma, bókin endaði vel og mér fannst þetta mjög áhugaverð lesning í alla staði. Ég greip aðeins í Hr. Alheim í gær en ég hef ekki náð að klára hana þar sem skólabækur ryðjast alltaf framfyrir í röðina. Þetta er skrýtið en gaman.

Mættur

Jæja við erum þá mætt eftir fína Köbenferð sem betur verður útskýrð seinna. Nóg að gera og ekki hefur verið tími til að svara e-mailum og svoleiðis, fer í það í dag og í kvöld.......

Dagarnir fljúga...

Það er ekki annað hægt að segja þegar að föstudagur er mættur á þess að gera vart við sig nema á dagatalinu. Ég er eitthvað andlaus og þreyttur þessa daganna og ætla að reyna breyta því og það helst í dag. Frikki og Gummi eru að leggja af stað frá Osló til Parísar klukkan 16:00 og verða þar fram á þriðjudag, þeir fengu ekki flug til Moskvu eins og ég stakk upp á í gærkveldi. Það mætti segja mér að þeir eigi eftir að hafa það skemmtilegt þarna.

Hjördís keypti diskinn með The Arcade Fire um daginn og þvílík snilld, ég hlustaði dáleiddur á bandið í gær, lá í baðinu og lét hugann reika um heim tónlistarinnar. Er að hlusta á nýja Rammstein diskinn núna og hann er þokkalegur, það er þessi óendanlegi kraftur sem að heillar mig, þeir eig alltaf nóg eftir. Helgin verður sennilega fín og ekki nema vika í köbenferðina okkar. Sjáum hvað gerist..

Af hinu og þessu..........

Það er nú saga að segja frá því að ég var kominn út á Miklubraut í gær þegar að pústutörið á Opelnum ákvað að fara í sundur. Hávaðinn var svo geggjaður að hestar í Efra Breiðholti sáust á hlaupum yfir hæðir og hóla, flutningabílstjórar viku út í kant og fuglalíf á suðurhorninu tók einhvern undarlegan kipp. Ég lét mig þó hafa það niður í vinnu án þess að grúfa mig niður í sætið. Félagi minn reddaði þessu svo á mettíma og tók lítið fyrir. Veit ekki hvort að fólk almennt geri sér grein fyrir því hvað mundi gerast ef að einhver tæki sig til og stæli öllum pústurörum bæjarins, sennilega kæmust við fljótlega í samband við lífform frá öðrum stjörnuþokum.
Fór í sund eins og oft áður á föstudagskvöldi og þar var margt um manninn, þarna sáust stuttbuxnadrengir sjálfstæðisflokksins með kúta og svo allskonar fólk. Ég veit ekki hvað það er við mig en ég þurfti að hlusta á mann sem þurfti endilega að segja mér frá því að hann hafi farið nýlega í hættulegasta uppskurð sem framkvæmdur hefur verið á klakanum, ég veit ekki af hverju hann sagði ekki hinum sem ég var með frá þessu, nei endilega að segja mér frá þessu. Ég hlustaði með lokað eyra og kvaddi svo bara hinn sáttasti. Kvöldið var fínt og Hjördís setti upp einhverja röð á sjónvarpsstöðvunum sem að ég skil ekki, þetta sjónvarpsdæmi er að verða svo flókið að Stöð 2 þyrfti að fara hafa námskeið í þessu, nei þetta er nú bara grín þar sem ég hef ekki prófað þetta ennþá en ég fer þá bara í SVV 103 (sjónvarpsvafrari) stutt þriggja eininga nám í fjarstýringaupplýsingartækni með möguleika á framhaldsnámskeiði upp á Bifröst sem á að nýtast vel í atvinnulífinu eins og allt annað sem þar fer fram og ekki.
Er að bíða eftir að Gummi hringi í mig frá Osló þar sem hann gat ekki talað er ég hringdi í hann áðan, gengur eitthvað illa að tala og keyra og sennilega svimandi sektir ef ég þekki norska skógarhöggsmanninn rétt, það er hálfur metri milli augnanna á venjulegum norskum skógarhöggsmanni, þetta er sökum þess að nauðsynlegt er að sjá báðum megin framhjá trénu er það er fellt. Ég er að reyna að skipuleggja smá U2 ferð þar sem draumur okkar hjóna hefur alltaf verið að sjá þessa drengi spila á tónleikum. Það væri óendanlega gaman að fara á túrinn þeirra í sumar. Þetta skýrist fljótlega.
Í kvöld er árshátíð saumaklúbbssins hennar Hjördísar sem væri ekki til frásagnar nema fyrir það að hátíðin fer fram á heimili mínu og þar af leiðir að ég er ekki velkomin í sófann til að læra á fjarstýringuna, nei þetta er svona vertu úti að leika þér pakki, ekki hefur verið ákveðið hvað verður....úbbss hringir síminn, Gummi.
Já það er ákveðið, það á að reyna að sjá U2 í köben 31 júli á Parken, það á að reyna að gera eitthvað nýtt í köben og vera ekki á sama stað og venjulega þó svo að kaffihúsið sem við höfum tekið morgumatinn á sé algjör snilld.
Frikki er að koma í heimsókn til Gumma á mánudag og stefnan hjá þeim er tekinn suður eftir og heyrðist mér þeir vera að spá í Róm, veit ekki hvort að það tengist páfanum eitthvað....sennilega ekki...hvað sem gerist og hvert sem farið verður þá eiga þeir allt gott skilið....
Jæja þetta er orðið gott í bili......